Пара алған әкімнің орынбасары 11 жылға бас бостандығынан айырылды

Шымкентте пара алған шенеуніктер мен кәсіпкерге сот үкімі шықты.

Айыпталушы орнында Еңбекші ауданы әкімінің бұрынғы орынбасары Ерік Тіленшин, әкімдіктің бас маманы, аты-жөні белгісіз кәсіпкер отыр.

Жемқорлыққа қарсы қызметкерлер анықтағандай, шенеуніктер өзара сөз байласып, мегаполисті абаттандыру жұмыстарын жүргізу кезінде кәсіпкерден 60 миллион теңге көлемінде пара алған. Сондай-ақ, әкімнің орынбасары мен оның қарамағындағы қызметкер қорымдарды күтіп ұстауға бюджеттен бөлінген 28 миллион теңгені жымқырған.

Сот үш айыпталушыны кінәлі деп таныды, ең ұзақ жазаны Ерік Тіленшин алды, ол 11 жылға бас бостандығынан айырылды. Әкімдіктің бас маманы 10 жылға сотталды, ал кәсіпкер үш жыл ғана жазасын өтейді. Сондай-ақ оларға мемлекеттік қызметте қызмет атқаруға тыйым салынды.