Пара алды деген күдікпен Антикор басшысының орынбасары ұсталды

Сыбайлас жемқорлыққа қарсы қызмет агентігі төрағасының бұрынғы орынбасары Мақсат Қожабаев ұсталды деген ақпарат шықты.

Бұл туралы «YEDILOV ONLINE» telegram-арнасы хабарлады.

«Кейбір дереккөздердің хабарлауынша, ҰҚК қызметкерлері сыбайлас жемқорлыққа қатысы бар деген күдікпен ҚР Сыбайлас жемқорлыққа қарсы қызмет агенттігі төрағасының бұрынғы орынбасарын ұстады» делінген хабарламада.

ҰҚК «Антикор» төрағасының бұрынғы орынбасары Мақсат Қожабаевтың ұсталғанын растады.

«2023 жылдың 9 қаңтарында Ұлттық қауіпсіздік комитеті сотқа дейінгі тергеп-тексеру аясында құқық қорғау органдарының бұрынғы жоғары лауазымды қызметкері М.Қожабаевты сыбайлас жемқорлық құқық бұзушылық жасады деген күдікпен ұстады. Басқа мәліметтер тергеу мүддесі үшін жария етілмейді» делінген хабарламада.

Қожабаев 2021 жылдың шілдесінен 2022 жылдың сәуіріне дейін «Антикор» төрағасының орынбасары болды. Бір қызығы, бұл оның осы құрылымда жұмыс істеудегі алғашқы тәжірибесі емес – Сыбайлас жемқорлыққа қарсы іс-қимыл ұлттық бюросының (қаржы полициясы) сыбайлас жемқорлыққа қарсы қызметі кезінде Қожабаев Қызылорда, Жамбыл облыстары мен БҚО бойынша қаржы полициясы департаменттерін басқарған.

Сол жылдары қаржы полициясын қазіргі сенатор Қайрат Қожамжаров басқарды. Алайда, Қожамжаров бас прокурор қызметін атқарған кезде Қожабаев прокуратурада басшылық қызметтерде болған.