Пандемияның басталғанына бір жыл. Президент халыққа үндеу жолдады

Мемлекет басшысы Қасым-Жомарт Тоқаев пандемияның басталғанына бір жыл болғанын еске салып, өзінің Twitter парақшасында жазба қалдырды. Бұл туралы ORDA. хабарлады.

Президент тура бір жыл бұрын дүниежүзілік денсаулық сақтау ұйымының (бұдан әрі ДДСҰ) пандемияның басталғанын жариялағанын еске салды. Сонымен қатар, ол азаматтардың өмірі мен денсаулығын сақтап қалу үшін пәрменді шаралар қабылданғанын айтты.

– Төтенше жағдай кезінде табыссыз қалған тұрғындарға қаржылай және басқа да көмек берілді. Біз береке-бірлік пен өзара қолдаудың арқасында өршіген індетті еңсердік.

Бірақ дерттің қатері әлі де сейілген жоқ. Вирусты вакцина арқылы ғана түбегейлі ауыздықтай аламыз. Барша отандастарымызды ауырып ем іздегенше, ауырмайтын жол іздеуге шақырамын, деді президент.

Бір жыл бұрын ДДСҰ пандемияның басталғанын жариялады. Содан бері Қазақстан бүкіл әлеммен бірге көптеген қиындықты бастан өткерді. Мемлекет азаматтардың өмірі мен денсаулығын қорғау үшін пәрменді шаралар қабылдады.

— Qasym-Jomart Toqayev (@TokayevKZ) March 11, 2021