Пәкістанда жұма намазы кезінде болған жарылыстан 15 адам қаза тапты

Пәкістан астанасы Исламабадта жұма намазы кезінде жарылыс болды. 15 адам қаза тауып, 80-нен астамы жарақат алды, деп хабарлады Orda.kz Dawn.com сайтына сілтеп. 

Жарылыс астананың Тарлай ауданында орналасқан жиын өтіп, уағыз айтылатын Хадиджа әл-Кубра қабырғасында  болған. Оқиға орнына дереу полиция мен құтқару қызметі жетті.

Бұл шабуыл Өзбекстан президенті Шавкат Мирзиёевтің екі күндік ресми сапары кезінде болды. 

Исламабад полициясы баспасөз хатшысы Тақи Джавадтың айтуынша, жарылыстың нақты сипатын анықтауға әлі ерте. Жарылыстың арнайы шабуылдан немесе алдын ала қойылған жарылғыш заттан болғаны сараптама нәтижесінде белгілі болады. 

Қауіпсіздік күштері жарылыс болған аумақты толық қоршауға алды. Сонымен қатар, ауруханаларда жараланғандар жағдайын бақылау үшін көмекші комиссарлар тағайындалды.

Ел астанасындағы емханада, Пәкістан медицина ғылымдары институтында (PIMS) және CDA ауруханасында төтенше жағдай режимі енгізілді. Негізгі жедел жәрдем бөлімі, ортопедия, күйік орталығы және неврология бөлімдері толық іске қосылған.

Парламент істері жөніндегі министр Тариқ Фазал Чаудри әлеуметтік желіде бұл шабуылды қатаң айыптап, «қорқақтық әрекет» деп баға берді. Ол қаза тапқандардың отбасыларына көңіл айтып, жараланғандардың тезірек сауығып кетуін тіледі.

Бүгінгі оқиға 2025 жылдың 11 қарашасында Исламабадтың G-11 ауданында және сессиялық сот ғимараты алдында болған жарылыстан кейін үш айға да жетпей қайталанып отыр. Ол кезде 12 адам қаза тауып, 30-дан астамы жараланған еді.

Оқи отырыңыз:

• Пәкістандықтар Тоқаевты саясат қайраткерлеріне берілетін орденмен марапаттады
• Тоқаев пәкістандық басылымға эксклюзив сұхбат берді