Пәтерін  жалға берген 70 оралдық жазаланады

Орал қаласының салық қызметкерлері үй-жайларын  шетелдіктерге жалға беріп, салық төлемей жүрген 70 пәтер иесін анықтады.

Бір қызығы, пәтерлерді заңсыз жалға берудің басым бөлігі полицияға жасырын түрде хабарланған. Нәтижесінде бесеуіне 45 000 теңге айыппұл салынса, қалғандары сотқа жолданды. Әкімшілік кодекс бойынша оларға 15 АЕК-ке дейін айыппұл салынады.

— Бұл салық төлеушілерге қатысты әкімшілік материалдар жасалып, сотқа жолданды. Сондай-ақ, осы  құқық бұзушыларға ӘҚБтК-нің 463-бабына сәйкес 15 АЕК көлемінде айыппұл салынатынын хабарлаймыз, - деді AstanaTV телеарнасына БҚО бойынша Мемлекеттік кірістер департаментінің бас маманы Абылай Малаев.

Статистикалық мәліметтерге сүйенсек, жұмылдыру жарияланған соң Оралға Ресейден 70 мыңға жуық адам келген. Олардың көпшілігі көшіп кетті, екі жарым мыңға жуық ресейлік қалада қалды. Шекарадағы жағдай әлдеқашан тұрақталып, тұрғын үй бағасы бұрынғы бағаға – 50-ден 100 мың теңгеге дейін арзандады.