«Пәтерімді су алды»: Шымкентте көпқабатты тұрғын үйлерге жауын суы өтіп кетті

Шымкентте тәулік бойы жауған нөсер жауын жаңадан салынып, қолдануға берілген бірнеше үйдің шатырынан өтіп кетті. Кей үйлерде жарық сөндірілген.

Тұран шағын ауданындағы 14-үйдің тұрғыны Ақбаян Құрманбаева үш баласымен тоғызыншы қабатта тұрады. Бір тәуліктен бері жауын суы электр жарығының түбінен сорғалап тұр. Қауіпті болған соң жарық сөндірілген.

- Үш балам бар. Бір күн жауған жауыннан үй суға толды. Алда бір апта жауын жауады деп жатыр. Су кепкенше бір ай уақыт керек дейді. Сонда біз бір ай осылай жарықсыз отырамыз ба? - дейді ол.

Ақбаян пәтерді «Шаңырақ» бағдарламасы арқылы ұзақ мерзімге несиеге алған. Құрылыс компаниясына шағымданғанымен, нәтиже болмаған.

Жауын суы осы ықшамаудандағы 32 тұрғын үйден де өткен. 5 қабатты үйдің үшінші қабатында екі баласымен тұратын Әйгерім Оразбаева да ішке кірген жауын суынан қабырғалар құлай бастады дейді.

 - Таңғы төртке дейін үйге кірген сумен алыстық. Бесінші қабаттағы пәтердің төбесі құлады. 65 пәтердің кемі отызынан су өтті. Мысалы, 2 бөлмелі пәтерге айына 85 мың теңге несие төлеймін. Жалғызбасты анамын. Судан еденім көтеріліп кетті. Енді не істеймін? - дейді ол.

Шымкент қалалық құрылыс басқармасы бұл мәселемен таныс. Басқарма басшысы Мадияр Байымбетовтің айтуынша, негізгі су шатырдан өтіп жатыр. Мердігер компанияға тапсырма беріледі. «Бір аптада қалпына келтіреміз» дейді ол.

Қалалық төтенше жағдайлар департаменті нөсер жауыннан қаладағы 8 көшедегі үйлердің ауласына да су толғанын хабарлады. Одан бөлек негізгі орталық көшелерді де су алғаны жөнінде әлеуметтік желілерде фото, видеолар тарады.