Пәкістанда ядролық бағдарламаның басшысы қайтыс болды

10 қазан күні Пәкістанның ядролық бағдарламасының басшысы саналған ядролық физик Абдул Қадир Хан COVID-19 салдарынан қайтыс болды.

Бұл туралы Orda.kz хабарлайды.

Физик жансақтау бөлімінде көз жұмған. Ол Фейсал мешітінде жерленеді. Ханның құрметіне бірнеше еске алу шаралары өтеді.

Батыс барлау қызметкерлері оны әлемдегі ең қауіпті адамдардың бірі деп санайды, себебі ол атом бомбасын жасау технологиясын Солтүстік Кореяға, Иранға және Ливияға берген.

Докторлық диссертациясын қорғағаннан кейін доктор Абдул Кадир Хан Амстердамдағы URENCO (уран байыту бойынша әлемдегі ірі өндірушілердің бірі) физика зертханасына жұмысқа орналасқан.

1974 жылы Үндістан ядролық қаруды сынақтан өткізгеннен кейін, URENCO-да жоғары лауазымға ие болған Абдул Қадир Хан ядролық қару жасау үшін Пәкістанға оралуға шешім қабылдайды.

1998 жылы 28 мамырда Пәкістан байытылған уранға негізделген алғашқы ядролық бомбасын сынақтан өткізді. 2004 жылы Хан Иранға, Ливияға және Солтүстік Кореяға ядролық құпияны заңсыз бергені үшін тұтқындалды. Бұл жаңалық Пәкістан жұртшылығын таң қалдырды.