Өзбекстанда жасөспірімді жезөкшелікке мәжбүрлеген 21 жастағы қыз ұсталды

Өзбекстан астанасында 21 жастағы қыз 17 жастағы танысын ұстап, оны жезөкшелікпен айналысуға мәжбүрлегені анықталды, деп хабарлайды Orda.kz.

Uznews мәліметінше, бұрын сотталған 21 жастағы Ш.Т. Ташкенттің Мирзо-Улугбек ауданындағы бір үйде 17 жастағы танысы М.М.-ны ұстаған. Жәбірленушінің телефонын тартып алып, оны сатуға әрекет жасаған. Сонымен қатар, М.М.-ның қорғансыз жағдайын пайдаланып, Ш.Т. оған жүйелі түрде психологиялық қысым көрсетіп келген.

Қазіргі таңда Ш.Т.-ға 18 жасқа толмаған адамды ұрлау, адам саудасы, күш көрсету арқылы заңсыз бостандығынан айыру және зорлықпен тонау баптары бойынша қылмыстық іс қозғалып, оған қамау түріндегі бұлтартпау шарасы қолданылды. Бұған дейін де Ш.Т.-ға қатысты істің болғаны белгілі.

Бастапқыда әлеуметтік желілерде кәмелетке толмаған қызды жезөкшелікке мәжбүрлеу мақсатында психологиялық қысым көрсетіп, зорлық әрекеттерін бейнелейтін видеожазбалар тараған. Құқық қорғау органдары тексеріс жүргізіп, видеодағы қыздардың кім екенін анықтаған.

Қазіргі таңда жыныстық құлдықтың құрбаны М.М.-ға Андижан облысының ұлттық әлеуметтік қорғау агенттігі психологиялық, құқықтық және әлеуметтік көмек көрсетіп жатыр.