Өзбекстан Швейцариядан экс-президенттің қызына тиесілі активтерді қайтарып алды

Өзбекстан Швейцариядан елдің бұрынғы президенті Ислам Кәрімовтің қызы Гүлнәр Кәрімоваға тиесілі 95 миллион доллар көлеміндегі активтерді қайтарып алды, деп хабарлайды Orda.kz.

Бұл қаражат екі ел арасындағы келісім аясында қайтарылған алғашқы транштың бір бөлігі.  Өзбекстанның Экономика және қаржы министрінің орынбасары Атабек Фазылкәрімовтің айтуынша, бұл сома «Uzbekistan Vision — 2030» ұлттық қорына аударылған және әлеуметтік мақсаттарға ғана жұмсалмақ.

Жақын арада Гүлнәр Кәрімоваға тиесілі тағы 182 миллион доллар көлеміндегі екінші транштың қайтарылуы күтіліп отыр.

Айта кетейік, Өзбекстан мен Швейцария 2022 жылы активтерді қайтару жөнінде алғашқы келісімге қол қойған. Ал 2024 жылдың ақпанында тараптар екінші келісімге келіп, 182 миллион долларды қайтару жөнінде уағдаласты. Бұл қаржы Кәрімоваға қатысты сыбайлас жемқорлық істерімен байланысты.

Сонымен қатар, биыл қаңтар айында Гүлнәр Кәрімова басқа түзеу мекемесіне ауыстырылған болатын.