Өзбекстан имамдарына әлеуметтік желілерді қолдануға шектеу қойылды

Өзбекстан мұсылмандары діни басқармасы имамдарға әлеуметтік желілерді қолдануға шектеу қойды. Мұның алдында кейбір имам желідегі сөзі үшін дауға қалған болатын.

Бұл жөніне «Радио Озодлик» жазды.

27 мамырда Өзбекстан мешіттеріндегі имамдар әлеуметтік желілерге кірмеу және ондағы жазбаларға «лайк» баспау туралы ескерту алды.

Ташкент қаласы бас имамының көмекшісі Эргаш Рустамовтың Telegram-да аудандардың бас имамдарына жіберген аудиосы тарады. Онда Рустамов имамдардың желідегі сөздері қатаң бақылауда екенін айтты.

«Сәлеметсіздер ма, құрметті аудан бас имамдары! Біздің келесі тапсырмамыз – әлеуметтік желілерге кірмеу. Мұны қатаң түрде бақылаймыз. Қажыға баратындарға да мұның қатысы бар… Әлеуметтік желіде кез келген тақырыпқа «лайк» қоюға болмайды»,- деді Рустамов.

Имамдар діни басқарма шешімін олардың қызметіне мемлекеттік бақылауды күшейту деп санайды.

«Олар мұны мүфтидің бұйрығы дейді. Қол-аяғымызды байлап жатыр»,- дейді ташкенттік имам.

Бұған дейін Өзбекстанда мешіт имамдары мен олардың орынбасарлары жеке төлқұжаттарын елдегі мұсылмандар діни басқармасы өкілдеріне өткізсін деген пәрмен түскені жөнінде хабар тарады. Мұның себебін имамдардың шетелге кетуіне жол бермеу деп түсіндірді.