Өзбекстан билігі Рамзан Қадыровтың кешірім сұрауын күтіп отыр

Өзбекстан парламентінің депутаты Одилжон Тожиев Шешенстан басшысы Рамзан Қадыровтың мәлімдемесін елдің ішкі істеріне араласу деп бағалап, қатаң сынға алды, деп хабарлайды Orda.kz.

Депутаттың айтуынша, мұндай әрекеттер Өзбекстан мен Ресей арасындағы достық қарым-қатынасқа кері әсерін тигізіп, екі ел халқының байланысына нұқсан келтіруі мүмкін.

«Мен Шешенстан басшысы Рамзан Кадыровтың Өзбекстанның ішкі істеріне араласуын, мемлекеттік қызметкерлерге қысым көрсетіп, қауіп төндіруін қатаң түрде айыптаймын. Мұндай әрекеттер дос боп отырған екі мемлекеттің қарым-қатынасын бұзып, халықтар арасындағы достықты әлсіретуі мүмкін», – деп мәлімдеді Тожиев.

Бұған дейін Рамазан Қадыров «сыртқы күштер Өзбекстанның тұрақтылығын бұзуға әрекеттеніп жатыр» деп, президенттің қызы мен күйеу баласының билікке ұмтылуы туралы қауесеттерді «жоспарланған сценарий» деп атады. Бұл сценарийлерді ол Батыс қолдайтын «түрлі-түсті төңкерістерге» ұқсатып, мұндай процестер ұсақ қақтығыстардан басталатынын ескертті.

Сонымен қатар, Қадыров Өзбекстанның бұрынғы шенеунігі Комил Алламжоновқа қастандық жасауға Шешенстанның қатысы бар деген айыптауларды жоққа шығарып, бұл ақпараттарды «арандатушылық» деп атады. Ол осындай жалған мәлімдемелердің артында кім тұрғанын анықтауға уәде берді.