Өзбекстан билігі Гүлнәр Кәрімованың активтерін қайда жұмсайтынын шешті

Өзбекстанның тұңғыш президентінің қызы Гүлнәр Кәрімованың Швейцариядан қайтарылған активтерінің 20 млн доллары ауыл мектептерін қайта құруға жұмсалады, деп хабарлайды Orda.kz. 

Кәрімованың активтерін қадағалайтын «Ишонч» («Сенім») қорында мектептерге ақша бөлу туралы шешім қабылданды. Бұл туралы БҰҰ-ның Өзбекстандағы өкілдігі хабарлады.

20 млн доллар осы жылдың 1 қазанынан бастап Өзбекстанда басталатын «Мектептердегі климат пен сумен жабдықтауға, санитарлық пен гигиенаға төзімділікті модельдеу» жобасына бағытталады. Бұл ақшаға республика бойынша 45 ауыл мектебі жөнделеді. Мекемелер сумен, жылумен және экологиялық таза энергия көздерімен қамтамасыз етіледі. 

Өзбекстанда жыл сайын оқушылар саны артып келеді. Бір жарым миллионға жуық бала суы мен жылуы жоқ мектептерде оқиды.

Айта кетейік, тамыз айында Қазақстан мен Өзбекстан арасында жасырын жерасты жолын салғандар сотталды.