Өз пікірін айтуға құқығы бар: Игорь Лепеха «әйелдердің тілі ұзын» деген депутат жайлы

Қазақстан ІІМ-нің орынбасары Игорь Лепеха мәжіліс депутаты Анас Баққожаевтың «тілі ұзын» әйелдері отбасылық жанжалдарға кінәлі деген мәлімдемесі жайлы өз пікірін айтты, деп хабарлайды Orda.kz тілшісі.

Сенат дәлізінде Игорь Лепехадан тұрмыстық зорлық-зомбылыққа қарсы жазаны күшейту туралы заң қабылдауға тырысып жатқан депутаттардың осындай мәлімдемелері жайлы сұралған болатын.

Мен депутаттың ұстанымына ештеңе дей алмаймын, себебі әр азамат, әсіресе депутаттар өз ұстанымына құқылы. Алайда жалпы депутаттық ортада бұл мәселені қарау керек деген пікір бар, – деді министрдің орынбасары.

Сондай-ақ ол Баққожаевтың мәлімдемесін ІІМ тыңдап, ескергенін атап өтті.

Шамасы ол өмірдегі жағдайға мысалы келтіргені болу керек. Әлде нақты айтты ма, білмеймін, – деді Лепеха.

Қоғамда зорлық-зомбылыққа қарсылық болып жатқанда депутаттардың мұндай пікірі қаншалықты дұрыс деген сұраққа Лепеха «ІІМ мәжілісмендердің сөзіне баға беруге еш құзыры жоқ» екенін айтты.

Меніңше әр азамат қолданыстағы заңнаманы бұзбаса, өз пікірін айта алады. Өйткені ол тұлғаның жеке ұстанымы. Егер бұл ұстанымда қолданыстағы заңнаманы бұзатын еш белгі болмаса, онда мен ұят дейтіндей ештеңе көріп тұрғаным жоқ, - деп қосты Игор Лепеха.

Бұған дейін мәжіліс депутаты Анас Баққожаев әйелдердің құқықтары мен балалардың қауіпсіздігі туралы жаңа заң жобасының тұсаукесері барысында отбасындағы қақтығыстардың көбі «әйелдердің ұзын тілінен» туындайтынын айтқан болатын.