Отандық тауар өндірушілерді мемлекеттік қолдау

7-ші жыл сайынғы ULTTYQ ÓNIM көрмесінде микро, шағын және орта бизнестің 320-ға жуық өкілі отандық тауарлар мен қызметтерді ұсынады.

5-7 мамыр аралығында Алматыдағы «Атакент» Іскерлік ынтымақтастық орталығында «Даму» кәсіпкерлікті дамыту қоры» АҚ ұйымдастыруымен отандық тауар өндірушілердің ULTTYQ ÓNIM жетінші жыл сайынғы көрмесі өтуде. Шара Алматы қаласы әкімдігінің қолдауымен өтуде.

Бүгін азық-түлік өнімдерін, киім-кешек пен аяқ киім, жиһаз, құрылыс материалдарын, машина жасау үшін құрал-жабдықтарды, химия өнеркәсібі өнімдерін және тағы басқаларын шығаратын кәсіпорындар өз өнімін ұсынуда.

Ауқымды көрменің ашылуына Қазақстан Республикасы Премьер-Министрінің орынбасары – Қаржы министрі Ерұлан Жамаубаев қатысты. Құттықтау сөз сөйлеген Ерұлан Кенжебекұлы кәсіпкерлікті дамыту басым бағыт екенін, сонымен қатар ұлттық экономиканың тұрақты дамуының маңызды факторы болатынын атап өтті.

Көрмеге өнімдері қойылған кәсіпкерлер жаңа әлеуетті тұтынушыларды табуға, қалыптасқан байланыстарды нығайтуға және іскер серіктестер табуға мүмкіндік алады. Көптеген кәсіпорындар үшін көрмеге қатысу – өз өнімдерін немесе қызметтерін танымал ету, сондай-ақ бір саланың адамдары арасындағы қарым-қатынас, жаңа таныстар мен идеялар арқылы «жарнамалаудың» тағы бір жолы. Іскерліктен басқа, көрмеге қатысу тұтынушылар мен олардың не күтетіні туралы көбірек білуге, өнімдер туралы жылдам кері байланыс алуға, ең бастысы, ұқсас өнімдерді өндірушілермен танысуға мүмкіндік алады.

Көрме 7 мамырға дейін жалғасады. Көме аясында кәсіпкерлер үшін қазақстандық сарапшылардан маркетинг, адам ресурстары, ұтымды өндіріс салаларында іскерлік келіссөздер, шеберлік сабақтары мен тренингтер ұйымдастырылады. Ал келушілер қазақстандық өндірушілердің тауарларын өз көздерімен көріп, ұстап көріп, сатып ала-алады. Сонымен қатар көрмеде жаңалықтармен танысу; қазақстандық дизайнерлердің сән көрсетілімін тамашалау; «Халық таңдауы» дәм тату  байқауына қатысу; қатысушы компаниялардан бағалы сыйлықтар ұтысында қатысу мүмкіндіктері бар.

Ұйымдастырушылардың айтуынша, іс-шара оң нәтиже мен  микро, шағын және орта бизнесті одан әрі дамытуға жаңа серпін береді, бұл ішкі ғана емес, сыртқы нарықта да сұранысты қамтамасыз етеді.