Отандық компаниялар мемлекеттік сатып алу конкурстарында басымдыққа ие болды

Отандық өндірушілер табиғи монополия субъектілерінен сатып алу кезінде бағаны 10%-ға шартты түрде төмендету түріндегі артықшылыққа ие болды, деп хабарлайды Orda.kz.

Түзетулер отандық материалдар, жабдықтар және басқа да өнімдерді өндірушілерді коммуналдық кәсіпорындардың тендерлеріне қатысуға ынталандыру үшін әзірленген.

«Қазақстанда тұрғын үй-коммуналдық шаруашылығын жаңғырту бойынша ауқымды жұмыстар жүргізіліп жатқанын ескерсек, тиісті тауарларға ұзақ мерзімді тұрақты сұраныс бар. Бұл отандық бизнес үшін жаңа перспективалар ашады» делінген Табиғи монополияларды реттеу комитетінің хабарламасында.

Комитет коммуналдық кәсіпорындар мен квазимемлекеттік сектор субъектілері болатын табиғи монополиялар субъектілерінің көпшілігі сатып алуды мемлекеттік сатып алу туралы заңнама мен «Самұрық-Қазына» қорының ережелері шеңберінде жүзеге асыратынын атап өтеді.

Табиғи монополиялар саласындағы заңнамалық актілерге енгізілген өзгерістер табиғи монополиялар субъектілері үшін сатып алулар тәртібін реттейді. 2023 жылы олар жалпы 93 миллиард теңгеден астам сомаға тауар сатып алған. Оның ішінде отандық тауар өндірушілер 26 миллиард теңгеден астам, ал импорттық тауар өндірушілер 66 миллиард теңгеден астам қаржыны құрайды. 

Бұған дейін Энергетика министрлігі жер қойнауын пайдаланушылар мен олардың мердігерлерінің көмірсутектерді барлау немесе өндіру және уран өндіру жөніндегі операцияларды жүргізу кезінде пайдаланылатын тауарларды, жұмыстар мен қызметтерді сатып алу қағидаларына өзгерістер енгізген болатын.