Отандық ғалымдар қуаңшылықпен күресу әдісін тапты

Шығыс Қазақстан облысының агрономдары мен ғылыми-қызметкерлері жердің ылғалдылығын сақтайтын био-препараттарды тәжірибе ретінде сынақтан өткізуде.

Бұл туралы  Orda.kz  ақпараттық порталы «Хабар 24» арнасына сілтеме жасап хабарлады. 

Бұл әдісті мамандар әзірше дәнді және майлы дақылдардың бірнеше түріне пайдалануда. Био-органикалық негізде жасалған жаңа препарат алқапқа жаңбырлату арқылы сумен бірге себіледі. Ең бастысы өсімдіктің сабағы мен жапырағына сіңген ылғал оның тамырына жиналып ұзақ уақыт сақталады. Бұл кез келген дақылды қуаңшылық пен құрғап кетуден сақтайды. Өсімдік тамырының жуандап, тереңге кетуіне де септігін тигізеді. Сонымен қатар егіс алқабын аурудан қорғайды.

Ғылыми-зерттеу станциясының сарапшылары жаңа препаратты екінші тәжірибеден өткізіп жатыр. Былтыр бидай мен күнбағысқа қолданылған екен. Нәтижесінде кейбір алқаптарда бидайдың түсімі 20 есеге дейін артқан. Ал биыл  бірінші жыл картопқа қолданылған.

— Былтыр да біздің өңірде құрғақшылық болды. Бірақ біз егіс алқаптарына құрғашылыққа қарсы био-препарат қолдандық. Ол өсімдіктің тамыр жүйесін нығайтып, ылғалды ұзақ сақтайды. Осылайша жоспарлағаннан бірнеше есе көп түсім  алдық. Бұл жобаны болашақта жетілдіре бермекпіз, – дейді ауыл шаруашылығы тәжірибе станциясының сарпашысы Ғайнұр Тоқтаров.