Отан алдында борышын өтеймін деушілер әскери бөлімді өздері таңдай алады

Елімізде енді Отан алдында борышын өтеймін деушілер әскери бөлімді өздері таңдай алады, деп хабарлайды Orda.kz.

Қорғаныс министрлігі MyArmy.kz интернет-порталын іске қосты.

Қазақстан Қорғаныс министрлігінің MyArmy.kz ресми порталы арқылы азаматтар әскери қызметке қатысты өтініш бере алады, ақпарат алып, сұрақ қояды. Бұл портал жастарға әскер туралы толық мәлімет алуға жағдай жасайды.

Соңғы жылдары әскердегі өзгерістердің бірі – қызмет орнын таңдауға қатысты жаңа өзгерістер. Мәселен, Ұлттық ұлан қатарына шақырылған сарбаздар енді үйіне жақын өңірде әскери борышын өтей алады. Бұл бастама әскерилердің әлеуметтік жағдайын ескеріп жасалған.

Сонымен қатар, батыс өңірде қызметін атқарып жүрген кейбір әскери қызметшілерге белгілі бір мерзімнен кейін бір реттік артықшылықпен келесі қызмет орнын таңдауға мүмкіндік беріледі. Дегенмен, бұл құқық тек бос лауазым бар болған жағдайда және әскери мамандығына сәйкес келген кезде ғана жүзеге асады.

Айта кетейік, 17 қыркүйек күні Алматы облысы Жамбыл ауданының Отар горнизонында 19 жастағы жас сарбаз өзіне-өзі қол салды. Мүрдесін көруге ата-анасы Алматы қаласына келді. Orda.kz тілшісі марқұмның ата-анасымен сөйлесіп, жағдайға қатысты пікірлерін білді.

Сонымен қатар, Маңғыстау облысында 18 жастағы жас сарбаз жындыханаға түсті.