Қостанайдағы өрттен зардап шеккендер баспанамен және азық-түлікпен қамтамасыз етіледі

Бірнеше сағаттың ішінде 11 үй өртеніп, тағы 2 үй зардап шекті. Баспанасынан айрылғандар «Дружба» диспансеріне орналастырылады, деп хабарлайды «Біздің Қостанай» газеті.

Өрт кешкі сағат 17:30 шамасында басталған. Куәгерлердің айтуынша, Тобыл өзенінің жағалауындағы қамыс өртенген. Қатты жел салдарынан өрт тез арада тұрғын үй аумағына тараған.

 «Төтенше жағдай салдарынан 11 тұрғын үй, 6 шаруашылық ғимараты және төрт жеңіл автокөлік, оның ішінде бір жүк көлігі жанып кетті. Өрт салдарынан тағы екі тұрғын үй ішінара зардап шекті, ғимараттардың жалпы ауданы 1000 шаршы метрді құрады. Қамыс өртенген аумақ шамамен 1,5 гектарды құрайды» деп хабарлайды басылым.

Бүкіл аумақ қою түтінге оранды. Өрт орнында штаб құрылды. Аумақты әскерилер қоршауға алды.

Өрт сөндірушілер 25 адамды эвакуациялады, оның бесеуі бала. Өрттен зардап шеккендер ыстық тамақпен қамтамасыз етіліп, «Дружба» диспансеріне орналастырылуға дайын. Қазірдің өзінде жергілікті атқарушы органдармен 20 орын дайындалған.

Қазір өрт толығымен сөндірілді. Зардап шеккендер IKomek жедел әрекет ету орталығына хабарласа алады, оларға көмек көрсетіледі, деп хабарлады жергілікті әкімдік.