Қостанайдағы колонияға  тыйым салынған заттарды кіргізбек  болған

Колонияға жасырын түрде  тоғыз телефон, ресей рублі және зарядтағыш кіргізілмек болған.

Қостанай облысындағы қауіпсіздігі жоғары мекемеге тоғыз телефон мен ресей рублін алып өтпек болғандардың жолы кесілді.

Polisia.kz хабарлағандай, контрабанда фактісі  «УК-161/2 мекемелері» РМУ күзет бөлімінің қызметкерлері әскери бөлім сарбаздарымен бірге мекемеге кіре берісте автокөлікті тексеру барысында анықталды.

«Автокөлік тоғыз телефон, 4000 теңге және 750 ресей рублі, сондай-ақ сим-карталар мен зарядтағыш алып өтпек  болған. Жүргізушіні әкімшілік жауапкершілікке тарту үшін бастапқы материалдар жинақталуда»  деді министрлік.

Жүргізуші ҚР ӘҚБтК-нің 481-бабы «Қылмыстық-атқару жүйесі мекемелерінде, арнаулы мекемелерде ұсталған адамдарды, тыйым салынған заттарды, бұйымдар мен заттарды өткізу» бойынша жауапқа тартылады.

Жалпы, жыл басынан бері тыйым салынған заттар контрабандасының алдын алу бойынша 23-ке жуық факті тіркелген.