Қостанайда қарақшы көшені қар басып қалғандықтан, көлікті ұрлай алмай қалды

Қостанай облысында көлікті айдап әкеткен қарақшы өтіп бара жатқан адамнан көлікті итеріп, көмектесуді сұраған. Мұны байқаған көліктің иесі полиция шақырған.

Келеңсіз жағдай Қостанай облысында орын алған. Қардан тазаланбаған жолдың арқасында Рудный қаласының тұрғыны көлігін ұрыдан аман алып қалған.

Көліктің иесі жағдайды жергілікті парақшалардың бірінде айтып берді. Ол қала әкімдігіне қаланы қардан уақтылы тазаламағаны үшін алғыс айтты.

Александр Шестаков сыртқа шығып, біреудің оның көлігін итеріп жатқанын байқаған. Белгілі болғандай, ұры көлікпен қар құрсауында қалып қойып, өтіп бара жатқандардан көмек сұраған. Осы кезде Александр полиция шақырып үлгерген.

Оқиға орнына дереу тәртіп сақшылары жеткен. Формадағы адамдарды көрген ер адам қашып кеткен. Алайда учаскелік полиция қызметкерлері Айдос Құлымбетов пен Ілияс Әділ оны ұстап үлгерген.

Желі қолданушылары оқиғаға қатысты төмендегідей пікір білдірді:

• «Әкімдік қамқорлық танытып жатыр»;
• «Әкім бұл видеоны көріп, қар тазалауды мүлде қоятын болды»;
• «Қарды уақтылы тазаламағаныңыз үшін рахмет. Тұрғын үй-коммуналдық шаруашылығына рахмет»;
• «Қыста джип ұрлау керек».