Қостанай шенеуніктері жолға бөлінген қаражаттың 27 млн теңгесін жымқырған

Қостанай шенеуніктері қаланың Набережная көшесін қайта жөндеу туралы шарт жасап, 612 миллион теңгенің 27 миллион теңгесін қалтаға баспақ болған. Бірақ, бұл құйтырқы әрекетті Қаржылық мониторинг агенттігінің Қостанай облысы бойынша аумақтық департаменті анықтады.

Бұл туралы Orda.kz хабарлайды.

«Тергеу мәліметтері бойынша, мердігер «Galara» ЖШС мен Қостанай қаласы әкімдігінің тұрғын үй-коммуналдық шаруашылығы, жолаушылар көлігі және автомобиль жолдары бөлімі арасында 612 миллион теңгеден астам сомаға Қостанай қаласының Набережная көшесін қайта жөндеу шарты жасалған. Galara» ЖШС Бас директоры ТКШ бөлімі инспекторының көмегімен іс жүзінде көрсетілмеген (құм-қиыршық тас қоспасынан, ұсақ тастан жасалған негіздердің төсейтін және тегістейтін қабаттарын орнату бойынша) қосымша қызметтер бойынша орындалған жұмыстардың жалған актісін ұсынды» делінген департамент хабарламасында.

Жалған акт негізінде ЖШС есеп шотына 27 миллион астам теңге негізсіз аударылған. Кәсіпорын директоры мен бөлім қызметкері 5 жылға бас бостандығынан айрылды.