Қостанай облысында пойыз алматылықтар мінген жүк көлігініне соғылды

Жүк көлігінің жүргізушісі мен жолаушы дене жарақатымен ауруханаға жеткізілді.

Темір жол бойындағы оқиға бүгін таңғы сағат 06:20-да Қостанай облысының Федоровский ауданында болды. Пешковка ауылынан бес шақырым жерде «Вольво» жүк көлігі теміржолға шығып кетіп, жұмысшы  пойызымен соқтығысқан.

«20 ақпан күні сағат 06.20-да полицияның кезекші бөліміне ауылдан бес шақырым жердегі  Пешковка маңында  жол-көлік оқиғасының болғаны  туралы хабарлама түсті. Оқиға орнына жеткен полиция қызметкерлері көліктің 45 жастағы жүргізушісі симафордың тыйым салу сигналына өтіп бара жатып, пойызбен соқтығысқанын анықтады. Жол-көлік оқиғасы салдарынан Volvo жүргізушісі мен жолаушысы түрлі дене жарақаттарын алып, Федоров аудандық ауруханасына жеткізілді»  деп хабарлады Қостанай облысы ІІД баспасөз қызметі.

Жүргізуші мен жолаушы Алматы қаласының тұрғындары екені атап өтілді. Полицейлер жүк көлігінің пойыз алдындағы жолға қалай түскенін анықтауда.