Қостанай мен Рудный қалалары карантинге жабылды

Аталмыш өңірлерде жабық спорттық- сауықтыру мекемелерінің қызметіне тыйым салынды. Сонымен қатар, бассейіндерді де пайдалануға болмайды. Қоғамдық тамақтану орындарында төрт адамнан артық отыруға рұқсат берілмейді. Жол бойындағы дәмханалар тағамдарды тек жеткізіп берумен ғана шектелмек. Автобус және такси қатынасы толық тоқтайды. Аталынып өткен шектеулер уақытша бір апта көлеміне белгіленді.

Павлодар мен Солтүстік Қазақстан облыстары ауру сандрының тым көптігіне қарамастан, аурулардың санын жасырып қалуға тырысуда. Кеше бұл мәселені президент те атап өткен. Жасанды статистиканы жасаушылар өз қателіктерін мойындады.

Әсет Жұматаев, Петропавл қалалық Санитарлық-бақылау басқармасының басшысы:

«Өсім бар. Өңірде сырттан келген 300 науқас анықталды. Олар басқа аймақтардан және шет елдерден келген. Статистикалық санақ кезінде қателік кеткенін мойындаймыз. Сондықтан президенттен сөгіс алып отырмыз. Қазіргі таңда бәрін анықтауға кірістік», - деген болатын өз жауабында.