Өскеменде жігіт жанұясын балтамен қырып, өрт қойды

Шығыс Қазақстан облысының орталығында түн қараңғылығында сұмдық қанды оқиға болды. Жас жігіт отбасы мүшелерімен бірге ішімдік ішкеннен кейін олармен жанжалдасып, ақыры бәрін балталап өлтіріп, қылмыс ізін жасыру үшін үйді өртеген, деп хабарлайды Orda.kz.

Қасіретті оқиға Өскеменнің тыныш аудандарының бірінде болған. Түн ортасында өртеніп жатқан үйді сөндіруге төтенше жағдайлар қызметі шақырылды. Алайда өрт сөндірушілер үйіндіні аршып жатқан кезде, жертөледен адамның жартылай күйіп кеткен денелерін тапты.

Оқиға орнына жеткен полиция қызметкерлері өртенген үйдің 76 жастағы иесі, оның 69 жастағы азаматтық жары және 51 жастағы туысының мерт болғанын анықтады. Бірақ өлім өрттен емес еді – сарапшылар дене бас сүйектерінен балта тиген жарақаттарды байқады. Бұл жай ғана өрт емес, қасақана ұйымдастырылған жаппай кісі өлтіру екені белгілі болды.

Ізі суымаған қылмыскер ұсталды

Тәртіп сақшылары көпке ұзамай күдіктіні қолға түсірді. Ол – осы үйде болған 27 жастағы жас жігіт. Тергеу барысында белгілі болғандай, ішімдік ішкеннен кейін туыстарымен ұрыс шығып, ашуға булыққан жігіт қолына балта алып, өз атасын, оның жары мен тағы бір жақын туысын аяусыз қырған. Кейін қылмыстың ізін жасыру үшін үйге от қойған.

Қазір оқиғаға байланысты тергеу амалдары жүріп жатыр. Полицияның мәліметінше, кісі өлтірудің себептері мен барлық мән-жайларын анықтау мақсатында кешенді сараптамалар жүргізілуде.

«Қылмысты жан-жақты зерттеу үшін барлық қажетті тергеу әрекеттері жүргізіліп жатыр.  Бұл іс ШҚО полиция департаменті басшылығының жеке бақылауында», – деп хабарлады ШҚО полиция департаменті.

Қылмыс орнынан балта мен пышақ табылып, айғақ зат ретінде тәркіленді. Қазіргі таңда ҚР ҚК 99-бабының 2-бөлігі – «Аса қатыгездікпен адам өлтіру» бойынша қылмыстық іс қозғалды.