Орыс тыңшылары Тоқаевтың ұлын қалай тұзаққа түсірмекші болғаны белгілі болды

Лондонның орталық қылмыстық сотында  «Ресейдің барлау агенттіктерінің тапсырысы бойынша тыңшылық жасады» деген айып тағылған болгариялық азаматтардың соты жалғасып жатыр, деп хабарлайды Orda.kz.

Сотта 33 жастағы Катрин Иванова, 30 жастағы Ваня Хаберов пен 39 жастағы Тихомир Иванчев айыптаулардың бәрін жоққа шығарды. Ал күдіктілердің екеуі — 46 жастағы Орлин Русев пен 43 жастағы Бизер Жамбазов тыңшылық жасағанын мойындады. 

Сот отырысының бірінде тыңшылық топ мүшелерінің Қазақстан президентінің беделін түсіруге тырысқаны туралы мәліметтер айтылды. 

Ресейлік тыңшылар жүзеге асыруды жоспарлаған алты «операцияның» екеуі Қазақстанмен байланысты болған. Олардың бірі қазір Ұлыбританияда жасырынып жүрген Атырау облысының экс-әкімі Бергей Рысқалиевке жасалған тінту шаралары. Екіншісі — Лондондағы Қазақстан елшілігінің жанындағы жалған «наразылық акциясы». Бірақ тыңшылардың қазақстандық биліктің беделін түсіру үшін жасаған жоспарлары мұнымен шектелмегені айтылды. 

Соттың мәліметі бойынша, ресейлік тыңшылар Ресейдің мүддесі үшін Қазақстан билігінің беделін түсіруге науқан ұйымдастыруды жоспарлаған. BBC ақпаратына сүйенсек, Қазақстанға жасалған ақпараттық шабуылдың мақсаты президент Тоқаевтың ұлы Тимур болуы мүмкін.

«Бал тұзағы» — бұл бүкіл әлем бойынша барлау агенттіктері жиі қолданатын тәжірибе. Мысалы, тыңшылық нысанына онымен жыныстық қатынасқа түсетін және кейіннен оны бопсалап, алдайтын тартымды адам жіберіледі. Демек ұйымдасқан топ Тоқаевтың ұлының атына жалған гей-порноның көмегімен кір келтіргісі келген.