Орыс тіліне ешқандай қауіп жоқ – Қазақстанның Ресейдегі елшісі

Қазақстанның Ресей Федерациясындағы елшісі Ермек Көшербаев Қазақстанда орыс тіліне ештеңе қауіп төндірмейді, бұл тілде бүкіл халық дерлік сөйлейді деп мәлімдеді.

Бұл туралы елші ресейлік «Россия 24» телеарнасына берген сұхбатында айтты.

– Қазақстанда орыс тіліне ештеңе қауіп төндірмейді. Бізде Қазақстан халқы түгел дерлік сөйлейді. Орыс тілінде ешқандай проблема жоқ. 90 пайызы осы тілде еркін сөйлейді, – деді Көшербаев.

Сонымен қатар, ол елімізде «қазақ тіліне қатысты мәселелердің» бар екенін атап өтті.

– Яғни, бұл Кеңес Одағы кезіндегі білім беру саясатындағы белгілі бір бұрмалаушылықтардың салдары, – деді дипломат.

Ол Қазақстан ғылым және білім министрлігінің мәліметі бойынша қазір республикада 6942 мемлекеттік мектеп бар екенін, оның ішінде 1121 мектеп (16%) орыс тілінде; 2075 мектеп (30%-дан астам) – аралас тілдерде.

– Бір миллионнан астам адам орыс тілінде оқиды. Еліміздегі халықтың ұлттық құрамына қарап, бұл өте жақсы көрсеткіш деп есептеймін, – деді Көшербаев.