Орыс тілі мұғалімі вице-министр болып тағайындалды

Үкімет қаулысымен Айзада Құрманова мәдениет және ақпарат вице-министрі болып тағайындалды. Ол бұған дейін Павлодар облысы әкімінің орынбасары қызметін атқарып, еңбек жолын орыс тілі мұғалімі болып бастаған.

Үкіметтің баспасөз қызметі Құрманованың вице-министр болып тағайындалғанын хабарлады.

Айзада Құрманова 1970 жылы туған, C.Торайғыров атындағы Павлодар педагогикалық институтын және Павлодар мемлекеттік университетінің магистратурасын бітірген.  Еңбек жолын орта мектепте орыс тілі мен әдебиеті пәнінің мұғалімі болып бастаған. Ол Екібастұз қаласындағы мектеп директорының орынбасары, директоры болып қызмет атқарған. Мемлекеттік қызметте – 2002 жылдан бері істеп келеді.

Құрманова Екібастұз қаласының ішкі саясат бөлімін басқарды, Екібастұз қаласы әкімінің орынбасары, Павлодар облысының ішкі саясат басқармасының басшысы болды. 2011-2014 жылдары Лебяжі ауданының әкімі, 2016-2020 жылдары Мәжіліс депутаты болды. 2020 жылдан бастап Павлодар облысы әкімінің орынбасары қызметін атқарды. Бұл қызметте ақпарат, жастар, тіл саясаты, азаматтық қоғамды дамыту және басқа да әлеуметтік мәселелерге жетекшілік етті.