«Орыс болғаным үшін»: Депутат Шаталов ұлтына қарай кемсітетінін айтты

Мәжіліс депутаты Владислав Шаталов өзіне қатысты «кемсіту» бар екенін мәлімдеп, бұл жағдайды өзінің «этникалық орыстығына» қатысты екенін айтты. Сонымен қатар өзін қазақ санайтынын мәлімдеді, деп хабарлайды Orda.kz.

«Бәріміз қазақпыз ғой! Маған қатысты айтылып жатқан сөздердің барлығына бір-ақ нәрсе айтқым келеді: мен өзімді қазаққа қарағанда орыс деп санамаймын, керісінше, мен үшін қазақ екенім – басты болмысым. Бірақ осы уақытқа дейін мені «ватник», «шетелдік агент», «прокремльшіл» деп те атады. Бұлардың ешқайсысы шындыққа жанаспайды. Менің өткір мәселелерге қатысты ұстанымдарымды мұқият қарап шығуға шақырамын. Соңғы уақытта мен туралы түрлі алып-қашпа әңгімелер тарады: бірі менің өмірбаянымда туған жерімді Қазақ КСР деп әдейі көрсеткенімді айтса, енді бірі ресейлік БАҚ менің сөздерімді контекстен жұлып алып, оларға мүлде басқа мағына беріп жатқанын алға тартады. Менің соңғы пікірімді әртүрлі түсінуге болатынын мойындаймын, бұл – менің қателігім. Бірақ оны толық оқымай немесе тыңдамай тұрып, тұжырым жасау дұрыс емес. Қазір әлеуметтік желілерде таралып жатқан айыптаулардың ешқайсысы шындыққа жанаспайды. Бірақ бұлардың астарында ашық манипуляциялар мен ақпараттық шабуылдар жатыр. Мен бұл әрекеттермен Мәжілістегі жұмысым басталғалы бері күресіп келемін, әрі бұл жолы да үнсіз қалмаймын. Мен Тәуелсіз Қазақстанда дүниеге келдім. Кеңес Одағы жоқ болатын, оған шүкір. Осы елде өстім, отбасын құрдым, балаларымды тәрбиелеп отырмын. Басқа Отаным болған емес, болмайды да. «Сүрінбейтін тұяқ, жаңылмайтын жақ жоқ» дейді. Осы жағдайдың қайталанбайтынына сендіргім келеді» деп жазды депутат Telegram-арнасында.

Бұл мәлімдеме әлеуметтік желілерде түрлі пікір тудырды. Бір тарап Шаталовтың сөзін қолдап, Қазақстанда ұлтқа байланысты кемсітушілік бар екенін алға тартса, екінші тарап оны манипуляция деп бағалады.

Еске сала кетсек, бұған дейін Шаталов өзінің туған жерін «Қазақ КСР» деп қойғаны үшін желілерде дау болған.