Орыс бойжеткен мектепте қазақ тілі пәнінен сабақ береді

Шымкент қаласының тұрғыны Кристина Бойко арманын орындап, қазақ тілі мұғалімі болып жұмыс істейді.

Otyrar.kz хабарлағандай, Кристина балабақшада да мемлекеттік тілді оңай меңгерген – ата-анасы оны қазақ тобына жіберген. Мемлекеттік тілді жақсы меңгерген бойжеткен болашақ мамандығын қазақ тілімен байланыстыруды ұйғарады.

– Менің ата-анам мені қазақ балабақшасына берген болатын. Мен сонда тіл үйрендім. Балалармен сөйлесе жүріп, үйреніп қалдым. Енді университетті үздік бітіріп, жұмысқа орналасып, қазақ тілінің дамуына үлес қосқым келеді, – дейді Кристина.

Достары оны жүрегі қазақ екенін айтады.

Қазір ОҚПУ-да қазақ тілі мен әдебиеті пәнінің мұғалімі мамандығы бойынша екінші курста оқиды. Ол мектептердің бірінде тәжірибеден өтіп, айналасындағыларды таң қалдыруда.

Оқу орнының директоры өз тәжірибесінде алғаш рет қазақ тілін орыс мұғалімі оқытып жатқанын мойындайды.

–  Мектебімізде тәжірибелік сабақтар өткізіп жатқан оқушылар өте көп. Бірақ Кристинамен болған жағдай ерекше. Біздің мектеп тарихында орыс қызы қазақ мектебіне алғаш рет келіп, қазақ тілінде сабақ берді. Кристина Андреевнаға алдағы жұмысына сәттілік тілеу ғана қалды. Біздің білікті ұстаздарымыз өз тәжірибесін болашақ мұғалімдерге жеткізуге бар күш-жігерін салады, – дейді Ы. Алтынсарин атындағы №2 мектеп-гимназиясының директоры Алмас Қайыпов.