Орынборда ішімдікке уланған 26 адам қайтыс болды

Ресейдің Орынбор облысында суррогат ішімдіктен уланып, 26 адам көз жұмды. 

Бұл туралы  Orda.kz TACC мәліметіне сүйеніп хабарлайды. 

Дұрыс дайындалмаған ішімдік ішіп уланғандар саны 49 адамнан 54-ке дейін жетті. Ауыр халде ауруханаға жеткізілгендер сол жерде қайтыс болды.

— Жалпы жаппай уланғандар арасынан 26 адам көз жұмып, 28-і аман қалды, тағы бір бөлігі стационарда жатыр, - деді Орынбор облысы өңірлік және ақпараттық саясат министрінің орынбасары Инна Аверкова.

Негізінде контрафакт ішімдіктен улану туралы хабар 7 қазан күні түнде түскен. Тергеушілер мен полицейлер іздестіру шаралары аясында қойма мен өндіріс бекетін тауып, 600 литр спирті бар сұйықтықты тәркілеген.

Аталған іс бойынша алты қылмыстық іс қозғалды. Алкоголь өнімдерін заңсыз өндіріп, сақтаған және сатқан алты адам тергеуге алынады.