«Ortonairovirus»: Жапонияда жаңа вирус табылды

Жапонияда бұрын белгісіз инфекция тудырған ауру анықталды. Мамандар вирустың кене шаққанда жұғатынын айтты.

Бұл туралы Orda.kz хабарлайды.

Жапондық ғалымдар зерттеу нәтижелерін Nature Communications журналында жариялады.

Белгісіз вирустың алғашқы жағдайлары Жапонияда 2014 жылы тіркелгені айтылды. 2020 жылға дейін ұқсас белгілермен жеті науқас тіркелген. Аурудың сипаты дене қызуының жоғарылауы, науқастардың қанында лейкоциттер мен тромбоциттер саны азаюымен байланысты.

Жапондық зерттеушілер екі науқастың бойынан вирусты бөліп алды, бұл қоздырғышты генетикалық талдауға мүмкіндік берді. Ғалымдар вирус жұқтырған адамның қанынан Ortonairovirus тектес бұрын белгісіз қоздырғыш бар екенін анықтады.

2019 жылы кене шаққан соң дене қызуы көтерілген Хоккайдо аралындағы ауруханаға екі науқас келген. Анализ бойынша кене шаққан адамдар белгісіз вирус жұқтырғаны айтылды. Вирустың көзін анықтау үшін зерттеушілер осы аймақтағы жабайы жануарлардан алынған үлгілерді сынақтан өткізді. Бұғы мен кене бұл вирусты тасымалдауы мүмкін екені айтылды.