Орталық Азия елдері президенттері Қазақстан халқын Наурыз мейрамымен құттықтады

Мемлекет басшылары құттықтауларында достық және әріптестік қарым-қатынастардың одан әрі нығая түсетіндеріне сенім білдірді.

Орталық Азия елдерінің басшылары Қазақстан Президенті мен еліміздің барша тұрғындарын Наурыз мейрамымен құттықтады, деп хабарлайды Orda.kz Ақордаға сілтеме жасап.

«Қырғызстан мен Қазақстан арасындағы ортақ рухани құндылықтар мен достыққа, сондай-ақ стратегиялық серіктестікке негізделген көп қырлы қарым-қатынастар біздің ортақ күш-жігеріміздің арқасында дәйекті түрде дами беруіне тілектеспін»  деп жазды Қырғызстан Президенті Садыр Жапаров құттықтау жеделхатында.

Өз кезегінде Өзбекстан Президенті Шавкат Мирзиеев Наурыз өзінің ежелгі тарихымен қатар философиялық мазмұны жағынан қазақ және өзбек халықтарының ортақ әдет-ғұрыптары мен құндылықтарын бейнелейтінін атап өтті.

«Тату көршілік қарым-қатынасқа негізделген өзара ынтымақтастығымыз халықтарымыздың ортақ мүдделеріне сәйкес кеңейетініне және жоғары деңгейде өзара байланыстарды одан әрі жандандыру стратегиялық серіктестік пен одақтастық қатынастарды нығайтуға көмектесетініне терең сенімдімін» деп жазылған Мирзиевтің жеделхатында.

Тәжікстан Президенті Эмомали Рахмон Тоқаевқа зор денсаулық және жаңа табыс, ал Қазақстанға бейбітшілік, молшылық пен өркендеу тіледі.

«Біздің елдеріміз Наурыз мейрамының өшпес құндылықтарын ұстана отырып, жаңа үміт пен ұмтылыспен стратегиялық серіктестік аясында достық қарым-қатынастары мен өзара тиімді ынтымақтастығын кеңейтіп, дамытатынына сенімдімін»  деді Тәжікстан басшысы.

Әзірбайжан президенті Ильхам Әлиев Наурыз мейрамының өзара түсіністік пен ынтымақтың символы екеніне тоқталып, екі ел арасындағы қолайлы қарым-қатынастың сақталуына сенетінін айтты.

«Біз халықтарымыздың еркі бойынша әзірбайжан-қазақстандық достық қарым-қатынастар мен серіктестікті сақтау және нығайту жолындағы бірлескен күш-жігерімізді жалғастыратынымызға сенемін»  делінген жеделхатта.

Сонымен қатар Түркіменстан, Иран және Грузия президенттері де құттықтау жолдады.