Өрт сөндірушілер уақытында келмесе - жанып кеткен үйдің құнын өтейді

Алматы облыстық соты өрт сөндірушілерді ауыл тұрғынының өртенген үйінің құнын өтеуге міндеттеді, деп хабарлайды Orda.kz.

2023 жылдың мамыр айында Алматы облысының Елтай ауылында өрт шығып, құрғақ шөп өртенді. 17:30-да жергілікті тұрғын өрт сөндірушілерге хабарласып, жалынның үйіне қауіпті  жақындағанын жеткізді. Алайда өрт сөндірушілер жауап қатпады.

Үй иесі өрт сөндірушілерді күтіп тұрғанда, жалын оның үйін шарпыды. Әкімдік өкілі мен жергілікті тұрғындар қолда бар құралдармен өртті сөндіруге мәжбүр болды.

Сағат 22:40-та ғана өрт сөндірушілер оқиға орнына келді, бірақ ол кезде үй түгелдей жанып кеткен еді. Материалдық шығын 11,9 млн теңге болды.

Жәбірленуші сотқа жүгініп, өрт сөндірушілер мен әкімдіктің әрекетсіздігін заңсыз деп тануды, сондай-ақ келтірілген шығынды өтеуді талап етті.