Қоршалған монумент, бұғатталған интернет. «Митинг өтеді» делінген алаңды полиция торуылдап жүр

Тіркелмеген «Демпартия» митингі өткіземіз деп мәлімдеген Алматыдағы «Тәуелсіздік монументі» темір қоршаумен қоршалып, ескерткіш маңында күрек ұстаған адамдар жөндеу жұмыстарын жүргізіп жатыр. Монумент орналасқан «Республика алаңын» жан-жағынан полиция көлектері торуылдап тұр.

Сол жерде жүрген ORDA. тілшісінің хабарлауынша, алаң маңында интернет мүлдем жоқ. Интернетті бұғаттайтын арнайы көлік тұр.

Тіркелмеген «Демпартия» оппозициялық ұйымы осы алаңға бүгін түскі сағат 12-ге өз жақтастарын митингіге шақырған болатын.

Бүгін Қазақстанда парламент сайлауы өтіп жатыр.

Оған елде ресми тіркелген алты партияның бесеуі қатысып жатыр. Олар: «Нұр Отан», «Ақ жол», «Адал», «Ауыл» және «Қазақстан халық партиясы». Ал ЖСДП партиясы сайлауға бойкот жариялаған.

Саяси додаға қатысып жатқан бес партия мәжіліс сайлауына барлығы 312 кандидат ұсынған. Кандидаттардың басым бөлігі биліктегі «Нұр-Отан» партиясы мен қазіргі парламентте отырған «Қазақстан халық партиясының» өкілдері.

Сайлауға түсіп жатқан саяси ұйымдардың арасында оппозициялық партия жоқ.