«Орнына мені ұр деп айтатынмын». Талдықорғанда туған әкесі ұрып-соққан 3 жасар баланың жағдайы белгілі болды

Күні кеше Талдықорғанда 3 жасар бүлдіршінді әкесі мас кезінде өлімші етіп сабаған. Сәбидің анасы Orda.kz тілшісіне сұхбат беріп, мән-жайды айтып берді.

3 жасар Ақжарқын ажал аузынан аман қалды. Қыз баланы туған әкесі ұрып-соққан. Ішімдікке мас ер адам баласының жылағанына шыдамай, ашуға беріліп оны аяусыз тепкілеген. Бұл кезде анасы Жадыра Жұмақанова жуынатын бөлмеде болған.

Жадыраның айтуынша күйеуі төрт күн бойы тоқтаусыз ішімдік ішкен. 

«Қызым шырылдап қатты жылап кетті. Жүгіріп кірсем ұрып тастапты. Сөйтсем кеудесі, арқасы, бет-аузы, қолы бәрі көгеріп қалған. Неге ұрасың десем, жылап қоймай қойды, жұбатайын деп едім деді. Мен күйеуіммен жанжалдаса бастап едім, ол мені ұрды. Сосын жедел жәрдем мен полиция шақырдым. Өйткені күйеуім мас, өршеленіп барады», - дейді бүлдіршіннің анасы Жадыра Жұмақанова. 

Жадыраның айтуынша, олар күйеуімен бір-бірін сүйіп, сезіммен қосылған. Некеде тұрғандарына бес жыл болған. Бірақ алғашқы күндерден-ақ тұрмыстық зорлық басталған. Тіпті жүкті кезінде де қол көтерген. Артынша тоқтағандай көрінгенімен, кейінгі жылдары ер адам ішімдікке салынып кеткен.

«Күйеуімнің телефонын далаға алып шығып, полицияға хабарластым. Үйге кірсем, қолына пышақ ұстап алыпты, «бұлай өмір сүргенше өлгенім артық» деп. Полиция қызметкерлері 10 минут ішінде келіп, алып кетті», - дейді Жадыра.

Жадыраның айтуынша, күйеуі інісінен айырылғаннан кейін осындай күйге түскен. Тіпті оның араласатын достары да жоқ дейді. Ол үйде жатып ішімдік ішетінін де жасырмады. Қазіргі таңда Жадыра қызының жанында, ал ұлын Жадыраның әпкесі қарап жатыр, ол бала екіде. 

«Маған үнемі «адам болмаймын»  деп айтатын. Үш рет өзіне қол жұмсамақ болды, әр жолы аман алып қалдым. Жастайынан жетім өскен, бауырлары жоқ. Сол себепті күйзеліске түсе ме, білмеймін», - дейді Жадыра.

Ер адам күзетші болып жұмыс істеп, Аягөзге барып-келіп жүрген. Әйелінің айтуынша, мұндай қатыгездік бұрын болмаған. Бірақ енесінің көзінше де қол көтерген кездері болған. 

«Енді кешірмеймін, заң алдында жауап берсін. Күйеуімнің туыс әпкесі де кешірім берме деп жатыр. Ол да ажырасып кету керек еді деді. Ол бұрын да ұрған қызымды сосын мен оны ұрма, орнына мені ұр деп айтатынмын. Содан кейін өзім таяқ жейтінмін. Дәрігерлер өміріне қауіп төніп тұрған жоқ, бірақ іш құрылысына зақым келген деп жатыр. Жансақтау бөлімінен бірақ шықты, қазір қасымда ұйықтап жатыр», - дейді Жадыра.

Бүлдіршінге 2024 жылы бауыр циррозы диагнозы қойылып, Түркиядағы жеке клиникада емделген. Оған ресейлік қайырымдылық қорлардың бірі көмектескен. Ақжарқынға бауыр трансплантациясы жасалған. Қайырымдылыққа қаражат жинауды қор мүшелері ұйымдастырған. Баланың жағдайы қатты ауырлап, соңғы сатыға жеткен. Ота сәтті өткен. Қазіргі таңда ота жасалған бауырына сәл зақым болған екен. Дәрігерлердің айтуынша өміріне қауіп төніп тұрған жоқ. 

«Талдықорғанда баланы емдеп жатқан дәрігер Түркиядағы әріптесіне ресми өтініш жолдаған. Ал түрік профессоры бізге қаржылай көмек көрсету туралы өзі хабарласты. Ол кезде тек баланың емес, анасының да жағдайы өте қиын еді. Себебі Жадыра отбасындағы зорлық-зомбылыққа сол уақытта тап болып жүрген. Бізге күйеуінен кетемін деп уәде берген», — дейді қайырымдылық қорының мүшесі Екатерина Доброва.

Облыстық балалар ауруханасының дәрігерлері баланың жағдайы тұрақты екенін хабарлады. Ақжарқын мен анасы қазір дәрігерлердің тұрақты бақылауында, қажетті медициналық көмек толық көрсетіліп жатыр.