Қордайдағы вакцина зауыты қызметкерлеріне 3 көпқабатты үй салынады

Қордай ауданындағы вакцина шығаратын зауыт жұмысшыларына  арнайы көпқабатты 3 үй салынып,  пайдалануға беріледі, деп хабарлайды ORDA жергілікті тілшісі.

Қордай ауданына жұмыс сапарымен барған облыс әкімі Бердібек Сапарбаев Гвардейский ауылына арнайы атбасын  бұрды. Мұнда биологиялық қауіпсіздік мәселелері институтының негізінде фармацевтикалық зауыттың ғимараты салынған. Жоба бойынша жылына 60 миллион доза түрлі вакциналар шығару жоспарланып отыр. Оның ішінде коронавирусқа қарсы вакцина да қарастырылмақ. Бердібек Сапарбаев зауыттың бірнеше қабатын аралап көрді. Осыдан кейін зауытты пайдалануға беру мәселесі бойынша кеңес өткізді.

Өңір басшысы қажетті құрал-жабдықтармен қамтамасыз ету жұмыстарына тиісті бақылаудың болуын назарда ұстауды ескертті.  Ол мүдделі тараптарды нысанның барлық GMP стандарттарына сәйкес келуін қамтамасыз ету үшін бірлесіп жұмыс істеуге шақырды.

Айт кетерлігі, зауытқа жақын маңда институт қызметкерлеріне арналып 3 көпқабатты тұрғын үй салуға орын бөлінген. Қазір 60 пәтерлі үйдің бірінде ішкі әрлеу жұмыстары жүргізіліп жатыр. Сонымен қатар  екі көпқабатты тұрғын үйдің құрылысы биыл қолға алынады. Бердібек Сапарбаев  60 пәтерлі үйде жүріп жатқан әрлеу жұмыстарын наурыз айында аяқтауды тапсырды. Жоба бойынша мұнда 1, 2 және 3 бөлмелі пәтерлер болады.