Қордай оқиғасы бойынша үш адам сотталды

Қордай ауданында орын алған жаппай тәртіпсіздікке қатысты қылмыстық іс бойынша үкім шықты.

• Жамбыл облысының қылмыстық істер жөніндегі мамандандырылған ауданаралық сотымен Руслан Сампарбаевқа қатысты жаппай тәртіпсіздікке қатысқаны (ҚК-тің 272б. 2б.), ұрлық жасағаны үшін (ҚК-тің 188б. 4б. 3т.);
• Айдос Минимтаевқа қатысты  жаппай тәртіпсіздікке қатысқаны және (ҚК-тің 272б. 2б.) бөтеннің мүлкін тонағаны үшін (ҚК-тің 191б. 2б. 1,3т.), жаппай тәртіпсіздікке қатысқаны үшін (ҚК-тің 272б. 2б.), қарақшылық жасағаны үшін (ҚК-тің 192б.4б. 2т.), Қазақстан Республикасының Мемлекеттiк шекарасын қасақана заңсыз кесіп өткені үшін (ҚК-тің 392б. 1б.);
• Мақсат Әуеловке қатысты жаппай тәртіпсіздікке қатысқаны үшін (ҚК-тің 272б. 2б.), адам өлтіргені үшін (ҚК-тің 99б. 2б. 6,11,15т.), екі немесе одан да көп адамды өлтіруге оқталғаны үшін (ҚК-тің 24б. 3б. – 99б. 2б. 1,6,11,15т.) қылмыстық іс қаралды.

Еске салсақ, 2020 жылдың 7-8 ақпаны аралығында Жамбыл облысы, Қордай ауданы Масаншы, Бұлар батыр және Ауқатты ауылдары аумағында атыс қаруын, жарылғыш заттарды қолдану, сондай-ақ билік өкілдеріне қарулы қарсылық көрсету арқылы зорлық-зомбылық, қирату, өртеу, дүние мүлікті жоюмен ұласқан жаппай тәртіпсіздік орын алды.

Жаппай тәртіпсіздіктердің басталуына жоғарыда аталған ауылдардың әр түрлі ұлт тұрғындарының арасында туындаған тұрмыстық жайлар негіз болған.

Жаппай тәртіпсіздіктің нәтижесінде, 2020 жылғы 7-8 ақпан аралығындағы түнде Масаншы, Бұлар батыр және Ауқатты ауылдарында орын алған жаппай тәртіпсіздік кезінде, 10 адам қаза тапты, 140 азаматтық тұлға мен 20 құқық қорғау органы қызметкерлері дене жарақаттарын алды, 99 жылжымайтын нысан қиратылды, 65 үй өртелді, 48 қозғалатын нысан қиратылды және 65 автокөлік өртелді.

Айта кетсек, бұған дейін 2021 жылы 27 сәуір Жамбыл облысының қылмыстық істер жөніндегі мамандандырылған ауданаралық сотының үкімімен Қордай ауданындағы жаппай тәртіпсіздіктерге қатысқан және басқа да қылмыстар жасаған 50-ден астам адам сотталған болатын.

СОТ ШЕШІМІ

Сампарбаев Русланға кінәсін ішінара мойындағаны есепке алынып, 6 (алты) жылға бас бостандығынан айыру түріндегі жаза;

Айдос Минимтаев кінәсін мойындамады, оған 11 (он бір) жылға бас бостандығынан айыру түріндегі жаза;

Әуелов Мақсат кінәсін мойындамады, оған 18 (он сегіз) жылға бас бостандығынан айыру түріндегі жаза тағайындалды.

Авторы: Исламбек Дастан