Orda.kz тікелей эфирі: Оразалы Ержанов Қазақстанда адамдарға қосымша ақы төленбейтінін айтты

Депутаттыққа кандидат Оразалы Ержанов Қазақстан кедейлік деңгейі бойынша Африка елдерімен тең дәрежедегі ұятты жағдайда екенін айтты.

Бұл туралы ол YouTube-тегі Orda.kz арнасының тікелей эфирінде Парламент Мәжілісі сайлауына өзін-өзі ұсынған кандидаттардың пікірсайысы барысында айтты.

— Кедейлік жағынан біз ел ретінде ұят жағдайға жеттік. Ресми кедейлік шегі жан басына шаққандағы шығындарға негізделеді. Қазақстанда бұл күніне екі доллар. Бұл Африканың ең кедей елдерінің деңгейі. Көбірек дамыған елдер  күніне – 3,5 доллар, Еуропа – 4-5 доллар, көбіміз көз алартып отырған көрші Ресейдің өзінде күніне – 6 доллар. Бұл өте маңызды көрсеткіш, жәрдемақы және басқасы осыдан анықталады, - деді Ержанов.

Оның айтуынша, елдегі халық кедей, өйткені «ЖІӨ 30 пайызға да жетпейді».

— Біз өз халқымызға артық төлем жасамаймыз. Менің бағдарламамда: біз адамдардың лайықты ақша табуы үшін жағдай жасауымыз керек. Салыққа келер болсақ: шағын және орта бизнес сияқты санаттарды алдағы бес жылда еш қиындықсыз салықтан босатуға болады, экономика одан тек пайда көреді, - деді «Елге қайтару» қорының негізін қалаушы Оразалы Ержанов.

Қоғам қайраткері Мұхтар Тайжан монополияны жою арқылы жүйелі жемқорлықты жеңуге болады деп есептесе, Ержанов басқа да бірқатар құралдарды атап өтті.

— Жалпыға бірдей сайлау құқығы, әділ сайлау, әділ сот және сөз бостандығы. Осы төрт нәрсе біздің қоғамда болса, жемқорлыққа орын болмайды, – деп қысқаша жауап берді ол.

Жарыссөзде Мұхтар Тайжан Ержановтың заңсыз жекешелендірілген кәсіпорындар мен мүліктерді қайтаруға қатысты жұмысын қолдайтынын айтты.

— Егер кенеттен сайлаушылар сізге емес, маған дауыс беретін болса, мен сіздің қорыңызбен байланыста боламын деп уәде беремін. Бірге жұмыс істейміз, – дейді Тайжан.