Оралдық кәсіпкерді қатыгездікпен өлтірген екі қылмыскердің ісі сотқа жолданды 

Оралда кәсіпкер Еркін Мұқанғалиевтің өлімі бойынша қылмыстық іс cотқа жіберілді.

Қылмыстық іс судья Шара Зайнуллинаның төрағалығымен қылмыстық істер жөніндегі мамандандырылған ауданаралық сотында қаралады. Алдын ала тыңдау күні әлі белгіленген жоқ.

Кәсіпкер Еркін Мұқанғалиев 2022 жылдың 6 тамызында қатыгездікпен өлтірілген. Оның көптеген пышақ жарақаты бар денесі П.Атоян атындағы стадион автотұрағынан табылды. Күдіктілер дереу анықталды. Бейнебақылау камераларына түсіп қалған жазбадан кәсіпкер мен тағы екі ер адамның кафедегі үстелде отырғанын, артынша олардың арасында жанжал туындап, олардың бірі Еркін Мұқанғалиевті пышақпен ұрғанын көруге болады. Кейін белгілі болғандай, кәсіпкер қылмыскерлерден қашпақ болғанымен, олар оны қуып жетіп, көшеде аяусыз пышақтап кеткен. Көп ұзамай екі күдікті 31 жастағы Руслан Қожантаев пен 21 жастағы Тұрлан Амангелді ұсталды.