Оралдың бұрынғы полицейі Украинада соғысып жүр

Оралдық бұрынғы полицейдің әкесі ұлының Украинада соғысып жүргенін растады.

Бұған дейін әлеуметтік желі қолданушылары ҚР Парламенті Мәжілісінің экс-депутаты Самиғолла Оразовтың ұлын оқ өтпейтін кеудеше киген және автомат ұстаған адам түскен суреттен таныған болатын. Азаттық Оралдың бұрынғы әкімі, экс-мәжілісмен Самиғолла Оразовтың ұлының Украинада Ресей әскері басып алған аумақта екенін растағанын жазған болатын.

Оның ұлы Бауыржан Оразов соғысқа өз еркімен қатысып жүрмеген  болып шықты. Соңғы жылдары ол отбасымен Ресейде тұрып, қыркүйек айында жұмылдыруға іліккен. Қазір ұлы Украинаның Энергодар қаласының маңында екен.

Самиғолла Оразовтың айтуынша, оның баласы бұрын Оралда полиция қатарында жұмыс істеген. Кейін Ресейге барып, үйленіп, сол жақта отбасын құрады. Бірнеше жыл бұрын Ресей азаматтығын алған.

Айдың басында әлеуметтік желіде оның көк және қызыл жолақтары бар пулеметпен қаруланған, оқ өтпейтін кеудеше киген суреті тарап кетті. Қолданушылар оны ҚР Парламенті Мәжілісінің экс-депутаты Самиғолла Оразовтың ұлы  - Батыс Қазақстан облысының бұрынғы полиция қызметкері Бауыржан Оразов екенін таныды.