Оралдық өз пәтерін қару-жарақ шығаратын шеберханаға айналдырды

Орал қаласының тұрғыны жатын бөлмесін қару-жарақ шығаратын шеберханаға айналдырды. Бірақ оған полиция және БҚО Ұлттық қауіпсіздік комитеті тосқауыл қойып, барлық өндірісті таратты, деп хабарлады Polisia.kz.

Белгілі болғандай, күдікті бұрын осыған ұқсас қылмысы үшін жауапқа тартылған.

«Облыстық полиция департаменті жедел-іздестіру шаралары барысында 61 жастағы азаматты тұрғылықты жері бойынша тінту кезінде оның жатын бөлмесін заңсыз атыс қаруын жасайтын шеберханаға айналдырғанын анықтады. Ол кісі бірнеше рет заңсыз өндіріспен айналысып, атыс қаруын немесе оның құрамдас бөліктерін жөндеумен, сондай-ақ оқ-дәрілерді заңсыз жасаумен шұғылданған», - деді БҚО ПД басшысы Мақсұтхан Әбләзімов.

Аталған факті 287-баптың 3-бөлігі және 288-баптың 2-бөлігі бойынша сотқа дейінгі тергеу басталды.