Оралдың «трамадол короліне» қатысты іс тоқтатылады - БҚО прокуратурасы

Әлеуметтік желіде «трамадол королі» деген лақап атпен танымал болған Николай Карповқа қатысты қылмыстық істі прокуратура «тоқтату керек» деп шешті. Өйткені «трамадол — есірткі емес».

Карповты  ұстағаннан кейін басталған тергеу үш айдан бері жалғасып жатыр. Бетперде киген қарулы күштер Орал тұрғынының үйіне баса-көктеп кіріп, оның қол-аяғын  байлап тастаған. Бейнежазбадан Карповтың қолына кісен салынып, тізерлеп отырғаны көрінеді.

Ұсталған азаматтың үйінен тек дәріханада және рецепт бойынша ғана сатуға болатын «Трамадол» және «Тропикамид» препараттары көп мөлшерде табылған. Карповтың үстінен бірден «Психотроптық және есірткілік заттарды заңсыз сақтау және өткізу» бабы бойынша қылмыстық іс қозғалды. Тергеу басталды. Екі айдан кейін Батыс Қазақстан облысының бас прокуроры міндетін атқарушы Александр Цуранков прокурорлар Николай Карповқа қатысты істі «тоқтатуы керек», өйткені «трамадол есірткі емес» деді.

— Сот-химиялық сараптама жүргізіліп, (Карповтан табылған) трамадол және басқа да препараттар есірткіге жатпайтынын көрсетті. Бұл рецепт бойынша сатылатын дәрілер, бірақ мұнда қылмыстық құқық бұзушылық жоқ. Біз істі жабуға мәжбүр боламыз. Иә, бұл істе дәріханадан тыс жерде дәрі-дәрмек сату бойынша  әкімшілік кодекс бұзылған, - деді Александр Цуранков жұма күні қоғам белсенділерімен кездесуде.

Тергеу қоғам белсендісі Аслан Өтеповтің арқасында басталған,  ол прокурорлар бұл  іске мүдделі екенін айтады. Батыс Қазақстан облысының бас прокуроры міндетін атқарушы Александр Цуранковпен кездесу барысында Өтепов оның қызметтен кетуін талап етті.

— Біз бұл зұлымдыққа, есірткіге, әсіресе трамадолға қарсы күресіп жатырмыз, ал бұл зиянды затты сатушы оңай босатылмақшы. Бұл жерде прокуратура да, Цуранковтың өзі де мүдделі. Ол қызметінен кетуі керек, біз бұған қол жеткіземіз, — деді Аслан Өтепов.