Оралда жол апатынан автобустағы 11 адам зардап шекті

Оқиға 17 қыркүйек күні Орал қаласында таңғы сағат 09:20-да Алаш пен Светлая көшелерінің қиылысында болған, деп хабарлайды Orda.kz.

БҚО ІІД баспасөз қызметінің хабарлауынша, көше қиылысында «Газель Некст» маркалы №1 маршруттық автобус пен Nissan Teana соқтығысты.

«Жол-көлік оқиғасы салдарынан Nissan Teana жүргізушісі мен екі жолаушысы, сондай-ақ маршруттық автобустың 8 жолаушысы ауруханаға жеткізілді. Оқиғаның мән-жайы мен егжей-тегжейлері анықталып жатыр. Оқиға орнында полиция мен төтенше жағдайлар қызметінің қызметкерлері жұмыс істеп жатыр»,  деп хабарлады полиция.