Оралда сауна иесі өлі күйінде табылды

Оралда «Нирвана» саунасынан жансыз әйелдің денесі табылды. Қайғылы оқиға 6 желтоқсан күні сағат 21:00-де Молдағалиев көшесі бойындағы әйелдің жұмыс орнындағы шаруашылық ғимаратында болған.

Марқұмның жасы 44-те, саунаның иесі екені белгілі болды. Көршілер әйелдің жақсы адам екенін айтып, араларында жанжал мен кикілжің болмағанын алға тартқан.

Мой город басылымының хабарлауынша, көршілер марқұм туралы бір ауыз жаман сөз айтпаған. Көп сөйлеспейтін, өзімен-өзі жүретіні және саунада кештер жиі өтетіндіктен, көршілері мұның қалай болғанынан хабарсыз екенін түсіндірді.

«Өз-өзіне қол жұмсау фактісі бойынша сотқа дейінгі тергеу басталып, тиісті сараптамалар тағайындалды. Қалған мәліметтер мен өзін-өзі өлтірудің себептері тергеу мүддесінде және Қылмыстық кодекстің 201-бабы аясында жарияланбайды» деді облыстық полицияның баспасөз қызметі.