Оралда билік рұқсат берген митинг өтіп жатыр

28 ақпан күні Орал қаласында саяси реформа жүргізу және саяси тұтқындарды босату талабымен билік мақұлдаған митинг өтіп жатыр. Жиынға келгендердің басты талаптары  - биліктің ауысуы, саяси себеппен қудаланғандарды босату, барлық деңгейдегі әкімдерге халық сайлауы.

Бейбіт жиынның ұйымдастырушысы, журналист Лұқпан Ахмедьяров митинг кезінде «18 миллион халқы бар елде мемлекетті басқаратын адамның табылмауы мүмкін емес» дегенін хабарлады Азаттық тілшілері. Акцияға  алматылық құқық қорғаушы Ғалым Ағелеуов те келіп, қосылған.

Митинг қатысушыларының бірі «Nazarbayev is a dictator» («Назарбаев – диктатор») деген жазуы бар плакат ұстап алған.

Орал қаласы ішкі саясат бөлімінің жетекшісі Ербол Көшеков жиын ұйымдастырушыларына плакаттарда  экстремистік сипаттағы жазулар бар, деп ескертті.

Ұйымдастырушылар «бұл экстремизм емес, шындық» деп жауап берген. Осыдан кейін жиын қатысушылары «Назарбаев – диктатор», «Шал, кет!» деп ұрандатты.

Бүгін  Қазақстанның бірқатар қалаларында наразылық акциялары өтіп жатыр. Наразылыққа шығушалардың ішінде тек осы Орал қаласындағы то қана биліктің мақұлдауын алған.