Оралда атысқа ұласқан төбелес видеоға түсіп қалды

Оралда орын алған жаппай төбелес бейнебақылау камераларына түсіп қалған. Басында ойын-сауық мекемесінде болған екі ер адам өзара жанжалдасып қалған. Артынша қақтығысқа қатысушылардың бірі тапаншасын алып, оқ атқан.

БҚО полиция департаменті оқиғаның «Астана» шағын ауданындағы сауда орталықтарының бірінің маңында болғанын хабарлады. Жақын жерде орналасқан дәмханада келушілер арасында жанжал шыққан. Ол көшеде жалғасқан жаппай төбелеске ұласқан.

33 жастағы ер адам жақын маңдағы көлікте адамдардың бірін күтіп тұрған. Ол таныстарының соққыға жығылғанын көріп, көліктен тапаншаны шығарып, одан жерге оқ атқан. Төбелеске қатысушылар қашып үлгермеген. Оқиға орнына жеткен полиция қызметкерлері оларды ұстады.

«Қаза болғандар жоқ, төбелеске қатысушылар жеңіл жарақаттармен аман қалды. 7 адам ұсталды, олар 25 пен 42 жас аралығындағы ер адамдар. Төбелеске қатысушылар бұзақылық жасағаны үшін қылмыстық жауапкершілікке тартылды, қарулар есепке алынды» деп хабарлады БҚО полиция департаментінің өкілі Болатбек Нұрғожин.