Оралда 25 жыл бұрын екі адамды өлтіргендерге сот үкімі шықты

04 шілде 2025 13:03 Дидар Қайрат

Фото: Pexels

Оралда 25 жыл бұрын екі адамды өлтіргендерге сот үкімі шықты. Сот айыпталушыларды 15 және 19 жылға бас бостандығынан айырды, деп хабарлайды Orda.kz жергілікті «Менің қалам» басылымына сілтеме жасап.

Батыс Қазақстан облысының қылмыстық істер жөніндегі мамандандырылған сотында 25 жыл бұрын болған қос кісі өлтіру ісіне қатысты сот үкімі жарияланды.

Айыпталушылар — 53 жастағы Асқар Батыров пен 50 жастағы Әлібек Сармағанбетов.

Сот үкіміне сәйкес, Батыров ҚР Қылмыстық кодексінің 99-бабының 2-бөлігі («Адам өлтіру») бойынша кінәлі деп танылып, оған қауіпсіздігі барынша жоғары мекемеде 19 жыл жазасын өтеу тағайындалды. Ал Сармағанбетовке дәл осындай мекемеде 15 жыл бас бостандығынан айыру жазасы кесілді. Екеуі де бұрын сотты болған.

Жәбірленуші тараптың азаматтық талабы ішінара қанағаттандырылды. Екі сотталушы жапа шеккендерге жалпы 30 миллион теңге өтемақы төлеуі тиіс.

Еске салайық, бұл қылмыс 2000 жылдың жазында болған. Полиция мәліметіне зер салсақ, Ружейников көшесіндегі №9 үйдің маңында көлік ішінде екі ер адамға оқ атылып, олар оқиға орнында көз жұмған. 24 жылдан кейін Асқар Батыров өз еркімен полицияға келіп, жасаған қылмысын мойындаған.
Айта кету керек, полиция Әлібек Сармағанбетовті бұйрық берген адам деп танығанымен, ол өз кінәсін мойындамай отыр.

Жаңалықтар

барлық жаңалықтар