Орал полигонындағы өрт бес күннен бері ауыздықталмай жатыр

Орал маңында ірі көлемдегі қалдықтарға арналған полигон бес күннен бері жанып жатыр. Адамдар ыстықта өрт пен түтіннің өткір иісінен терезелерді жабуға мәжбүр, деп хабарлайды «Мой город».

Орал қаласының әкімдігі 27 тамызда белгісіз біреулер түсті металл алу үшін кабельдерді өртеп жіберіп, өрт «Жайық таза қала» ЖШС карьерінің аумағына жайылғанын хабарлады. Құрғақ шөптер мен бұталар өртеніп, кейін жалын қоқысқа тараған. Шамамен жанған аумақ бір гектарды құрады.

31 тамызда БҚО Төтенше жағдайлар департаменті бастығының орынбасары Рашид Біләлов өрттің таралуы уақытша тоқтатылғанын, бірақ тұтану әлі жалғасып жатқанын айтты.

— 27 тамыздан бері «Жайық таза қала» ЖШС мен Батыс Қазақстан облысы Төтенше жағдайлар департаментінің қызметкерлері екі ауысымда полигонды сөндіруде. Ауысымда «Жайық таза қала» ЖШС-нен – 38 техника мен 45 адам, БҚО Төтенше жағдайлар департаментінен – бес техника мен 25 адам бөлінді, - деді Рашид Біләлов.

Өрт сөндіруге 6363 тонна топырақ әкелініп, 2054 тонна су жіберілген.

Төтенше жағдайлар департаменті бастығының орынбасары өрт сөндірушілер кабель жанған жерді тауып, бұл туралы Орал қалалық полиция басқармасына хабарлағанын атап өтті.

«Жайық Таза Қала» ЖШС полигоны 2003 жылдан бері жұмыс істейді, оның жалпы ауданы 10 гектар. Полигонға қатты тұрмыстық қалдықтар, ағаш бұталары мен жапырақтары, сонымен қатар қыста қаладан түскен қар шығарылады.