Орал қаласының тұрғыны итті көлігінің артына байлап, қала ішінде жүрген

Орал қаласының тұрғыны көлігінің артына итті байлап алып, жол үстінде сүйреген. Аталған оқиғаға байланысты жергілікті полиция департаменті түсініктеме берді.

Бұл туралы Orda.kz хабарлайды.

Әлеуметтік желіде итті сүйреген көліктің видеосы тарады. Видео авторы болған жағдайды көліктің артынан ере отырып түсіріп алған. Оның айтуынша аталған кадрлар Оралда түсірілген.

Полиция департаментіндегілер көліктің иесін анықтады. Ол Орал қаласының 55 жастағы тұрғыны болып шықты.

– Өкінішке қарай, ит өліп қалды. Аталған факт полиция басқармасында тіркелді. Қазіргі таңда полиция қызметкерлері оқиғаның мән-жайын анықтап жатыр, - деді полиция департаментіндегілер.

Итті көліктің артына байлап сүйреу немесе оны қорлау Қазақстанда бірінші рет орын алып тұрған жоқ. Осы тақырып төңірегінде экология, геология және табиғи ресурстар вице-министрі Әлия Шалабекова сөз қозғаған еді. Ол Қылмыстық кодекстің 316 бабында (Жануарларды қорлау) көрсетілген жаза түрлерін арттыруды туралы айтқан болатын.