Оқу-ағату министрі адамдарды құтқарған 11 мектеп оқушысын Астанаға шақырып, марапаттады

Балалармен  кездесуге белгілі спортшылар мен өнер қайраткерлері шақырылды.

Оқу-ағату министрі  Ғани Бейсембаевтың шақыруымен Астанаға 11 оқушы келді. Жігіттер алғыс хаттармен және лагерьге жолдамамен марапатталды, деп хабарлайды Білім министрлігінің баспасөз қызметі.

Батыл оқушылар Атырау, Қарағанды, Қызылорда, Солтүстік Қазақстан, Түркістан облыстарынан келді. Олардың ең кенжесі – сегіз жасар Нұриддин Амантай үйдегі өрт кезінде әпкесін аман алып қалды. Әмірхан Абай, Нұрболат Ермағамбет және Сұлтан Малқажар батып бара жатқан досын судан алып шықты. Тоғыз жасар Жансерік Әлім өрт кезінде інісі мен қарындастарын аман алып қалды. Оразәлі Зиноллаев, Саян Есбол, Марал Ғаниев және Нұрболат Нұркелді де  балаларды суға батып кетуден құтқарды.

Министр балаларға батылдық пен табандылықтары үшін алғыс білдірді.

— Адам өмірін құтқару – асқан ерлік. Мен біздің мектеп оқушылары арасында ғажап ерлік, батылдық пен ержүректіктің лайықты үлгілері барын мақтан тұтамын. Елімізде осындай мейірімді бала  тәрбиелеп өсірген ата-аналарыңыз бен ұстаздарыңызға алғыс айтамын, - деді Ғани Бейсембаев.

Балалармен ҚР еңбек сіңірген қайраткері Светлана Айтбаева, еңбек сіңірген спорт шебері, Олимпиада чемпионы Серік Сәпиев, қазақ дзюдошысы және самбошы Руслан Сейілханов кездесті. Батыр балалар мен олардың ата-аналарына министрдің алғыс хаттары, сонымен қатар энциклопедиялар, спорттық құрал-жабдықтар мен лагерьге жолдамалар табысталды.

Сонымен қатар, балалар үшін қызықты экскурсиялар мен кездесулер өткізілді.